Бундан дүүрэгт автобус 32 тээврийн хэрэгсэл мөргөж, 57 хүн гэмтжээ

Сөүлээс өмнө зүгт орших Сонгнам хотын Бундан дүүрэгт Лхагва гарагийн өглөөний оргил цагаар хотын автобус гэрлэн дохионд зогсож байсан 30 гаруй тээврийн хэрэгслийг мөргөж, 57 хүн гэмтжээ. Энэ тухай Корея Таймс сонин албаны хүмүүсийг иш татан мэдээлэв.

60-аад насны эрэгтэйн жолоодож явсан автобус өглөөний 7:34-д өөр 4 автобус, нэг ачааны машин, 27 суудлын автомашиныг мөргөсний эцэст замын хашлага мөргөж зогссон байна. Мэдээллээр, автобус 100–150 орчим метр зайд тээврийн хэрэгслүүдийг мөргөсөн гэнэ.

Ослын улмаас 9 хүн хүнд, 48 хүн хөнгөн гэмтэл авсан бөгөөд гэмтэгсдийн хэн нь ч амь насны аюултай байдалд ороогүй гэнэ.

Жолооч тоормос ажиллаагүй гэж цагдаад хэлсэн гэх бөгөөд мөрдөн байцаагчид ослын яг шалтгааныг тогтоохоор ажиллаж байна. Жолооч согтууруулах ундаа хэрэглээгүй ч мансууруулах бодис хэрэглэсэн эсэхийг нь цагдаа шалгах юм.