Филиппиний армид радар систем, нисгэгчгүй онгоц нийлүүлэхээ Япон зарлав

Япон улс Филиппиний армид 4.3 тэрбум иенийн өртөгтэй радар систем болон нисгэгчгүй онгоц нийлүүлэхээ даваа гарагт зарласан гэж Киодо агентлаг мэдээлжээ.

Японы Гадаад хэргийн яамны мэдээлснээр Филиппиний Тэнгисийн цэргийн хүчинд эргийн радар систем олгох нь 2023 онд эхлүүлсэн аюулгүй байдлын албан ёсны тусламжийн хөтөлбөрийн хүрээнд Японд үйлдвэрлэсэн бэлэн батлан хамгаалах бүтээгдэхүүнийг анх удаа шилжүүлж буй хэрэг юм.

Филиппин дэх Японы Элчин сайд Кацуро Китагава, Филиппиний Гадаад хэргийн сайд Мария Тереза Лазаро нар Манилд гэрээнд гарын үсэг зурав. Гэрээнд Филиппиний Агаарын цэргийн хүчинд тагнуулын зориулалттай нисгэгчгүй онгоц нийлүүлэх асуудал ч багтжээ.

Төсөл нь Япон, Филиппиний аюулгүй байдлын хамтын ажиллагааг ахиулах, Японы хувьд чухал далайн замын аюулгүй байдлыг бэхжүүлэхэд тус төсөл чухал гэж яам онцолсон байна.

АНУ-ын Азийн хоёр холбоотон Энэтхэг-Номхон далайн бүс дэх Хятадын цэргийн идэвхжил нэмэгдэж байгаад санаа зовж, сүүлийн жилүүдэд аюулгүй байдлын хамтын ажиллагаагаа гүнзгийрүүлсээр байна.

Бээжин Зүүн Хятадын тэнгис дэх Японы хяналтад буй Сенкаку арлуудыг өөрийнх гэж маргадаг бөгөөд Өмнөд Хятадын тэнгист Филиппин болон бусад оронтой нутаг дэвсгэрийн маргаантай байна.