Израилийн сөрөг хүчний удирдагч Айзенкот хямралын үед засгийн газар байгуулахад бэлэн байгаагаа мэдэгджээ

Израилийн парламентын сонгуульд хоёрдугаар байр эзэлсэн Яшар намын удирдагч Гади Айзенкот улс орон ноцтой хямралд орсон тул түншүүдийнхээ хамт шинэ засгийн газрыг аль болох хурдан байгуулахаар ажиллаж байгаагаа мэдэгдсэнийг Таймс оф Израэл сонинг иш татан Интерфакс агентлаг мэдээлжээ.

Тэрбээр одоогийн засгийн газрыг Израилийн ардчиллын оршин тогтнолд заналхийлж байна гэж шүүмжилжээ.

Айзенкотын хэлснээр Израилийг ардчилсан, еврей улс гэж хүлээн зөвшөөрөх, Тусгаар тогтнолын тунхаглалын үнэт зүйлийг баримтлах, бүх иргэн армид заавал алба хаах, Хамас хөдөлгөөнийг террорист гэж хүлээн зөвшөөрч устгах гэсэн дөрвөн зарчмыг хуваалцсан аливаа нам эвсэлд нэгдэж болно.

Тэрбээр дахин сонгууль болохоос сэргийлж, Ерөнхий сайд Биньямин Нетаньяхуг албан тушаалдаа үлдэхийг зөвшөөрөхгүй байх шаардлагатай гэжээ. Айзенкотын хэлснээр Нетаньяхуг 46 депутат дэмжиж, 74 депутат түүнд итгэл үзүүлэхээс татгалзсан бөгөөд 67 депутат Айзенкотыг шинэ эвсэл байгуулахыг дэмжиж байна.

10 дугаар сарын 27-ны сонгуульд Нетаньяхугийн Ликуд нам 27 суудал авч тэргүүлсэн бол түүний холбоотнууд 26 суудал авчээ. Айзенкотын Яшар нам 21, тус блокийн бусад сөрөг хүчний намууд 27 суудал авсан байна.