Хонконгийн Та Кву Лин шинэ хотхонд 2035 оноос оршин суугчид нүүж орно

Хонконгийн хилийн ойролцоох Та Кву Лин орчмыг худалдаа, үйлдвэрийн бүс болгон хөгжүүлэхтэй холбогдуулан тэндхийн оршин суугчид, аж ахуйн нэгжүүд 2028 оны дунд үеэс нүүж эхэлнэ гэж засгийн газар мэдэгдсэнийг Эр Ти Эйч Кэй радио мэдээлжээ.

Хөгжлийн товчоо хөгжлийг хурдасгахад зах зээлийн хүчийг идэвхтэй ашиглахаа илэрхийлсэн. Анхны оршин суугчид 2035 оноос нүүж орох боломжтой аж.

Хойд метрополис төлөвлөгөөний дагуу 1175 га талбайтай Та Кву Лин хөгжлийн шинэ бүсийг үе шаттайгаар хөгжүүлэх юм. 2020 онд ажиллаж эхэлсэн Хён Юэн Вай хилийн боомтын дэргэдэх тэргүүлэх хөгжлийн бүсийг 21 хувиар өргөтгөж, 250 га болгохоор товчоо Хойд дүүргийн зөвлөлд хүргүүлсэн баримт бичигтээ дурджээ.

Тэргүүлэх бүс доторх их сургуулийн хотхон өмнөх 30 га-гийн оронд 75 га газар эзлэх юм. Олон нийтийн саналын дагуу Хонконгийн Тайзны урлагийн академийн хоёр дахь кампуст долоон орчим га газар нөөцөлсөн байна.

Зарим үйлдвэрийг их сургуулийн хотхонд багтаах тул зөвхөн үйлдвэрт зориулсан газар 64-өөс 19 га болж багасах аж.

Өөрчлөлтийн улмаас тус бүсэд өмнө төлөвлөсөн 17 мянгаас 19 мянган орон сууцны оронд 13 мянгаас 14 мянган шинэ орон сууц барихаар болжээ. Тэнд 34 мянгаас 37 мянган хүн амьдрах бөгөөд ажлын байрны тоо өмнөх тооцооны 47 мянгаас 27 мянга орчим болж буурах юм.

Товчооны мэдээлснээр газар чөлөөлөх, нураах ажил 2028 оны хоёрдугаар улиралд, газар тэгшлэх ажил мөн оны дөрөвдүгээр улиралд эхэлнэ. Анхны газар 2030 оноос өмнө бэлэн болохгүй гэнэ.

Засгийн газар нүүх оршин суугчид, аж ахуйн нэгжүүдэд нүүлгэн шилжүүлэлт, нөхөн олговор, тусламж үзүүлэхээ амласан. Албаны хүмүүс мягмар гарагт дүүргийн зөвлөлийн гишүүдээс ажлыг хурдасгах талаар санал авах юм.