Хуан Лэ Хонконгийн паспортоор Тайваньд хэд хэдэн удаа ирж хиймэл оюуны компаниудтай уулзжээ

Нвидиагийн гүйцэтгэх захирал Дженсен Хуантай гэр бүлээс гадуурх харилцаатай байсан Хятадын иргэн Хуан Лэ (Алис Хуан) 2024, 2025 онд дор хаяж хоёр удаа Хонконгийн паспортоор Тайваньд ирж, тус арлын хиймэл оюуны нийлүүлэлтийн сүлжээний компаниудтай байнга холбогдож байжээ. Энэ тухай Эр Эф Ай радиогийн хятад хэлний алба Нью-Йорк Таймс сониныг иш татан мэдээлэв.

Мэдээллээр, Тайвань АНУ-ын засгийн газрын зөвлөмжөөр 2024 оноос Хуан Лэгийн айлчлалыг хянаж эхэлжээ.

Хуан Лэ 2024 онд Тайбэйн нэгэн баарт болсон цугларалтын үеэр Дженсен Хуаныг урьж ирүүлж чадна гэж хэлсэн бөгөөд дараа нь Хуан Нвидиагийн өөр хоёр удирдах ажилтны хамт ирсэн гэж Нетсандер компанийн гүйцэтгэх захирал Паркер Шмитт ярьжээ.

Тайваний Дотоод хэргийн сайд Лю Шифан 11-нд засгийн газар Хуан Лэгийн зөвшөөрлийг хүчингүй болгосон тул тэрбээр дахин Тайваньд ирэх боломжгүй гэж мэдэгджээ. Тэрбээр урьдчилсан шалгалтын журмаа эргэн харна гэж хэлсэн байна.

Гадаад хэргийн яамны дэд сайд Чэнь Минчи холбогдох хүмүүсийн нэвтрэлтийг журмын дагуу хийсэн гэж тайлбарлаж, Хуан Лэг Хятадын тагнуулч гэх нотолгоо түүнд байхгүй, мөрдөн шалгах эрхгүй гэжээ. Тайваний Залуучуудын ардчилсан холбооны гишүүн Жан Юмэн харин Хуан Лэ Хятадын Төрийн аюулгүй байдлын сайд Чэнь Исиний шууд удирдлага дор ажилладаг гэж олон нийтийн сүлжээнд бичжээ.

Эх газрын асуудал хариуцсан зөвлөлийн дарга Цю Чуйжэн тодорхой хэргийн талаар тайлбар өгөхгүй ч Тайвань Хятадын тагнуулын нэвтрэлтээс бүх талаар сэргийлж, үүнд чиглэсэн 17 арга хэмжээ хэрэгжүүлэх юм гэжээ.

Хуан Лэгийн удирддаг Сингапурын Мегаспийд компани өндөр зэрэглэлийн хиймэл оюуны чип их хэмжээгээр худалдан авсан нь Тайвань зэрэг олон орны анхаарлыг татжээ. АНУ-ын тагнуулын албаныхан түүнийг Хятадын тагнуулын ажилд холбогдсон гэж сэжиглэж байна.