Нигерийн Агаарын цэргийн хүчин осолдсон онгоцны бүхээгийн дуу бичигчийг олжээ
Шинжээчид ослын шалтгааныг тогтоохоор мөрдөн шалгаж байна.
Нигерийн Агаарын цэргийн хүчин Ондо мужийн Игбокода орчимд осолдсон АТР-42 онгоцны бүхээгийн дуу бичигчийг ослын газраас олсныг Премиум Таймс сонин мэдээлжээ.
Агаарын цэргийн хүчний олон нийттэй харилцах хэлтсийн дарга Эхимен Эжодамегийн хэлснээр техникийн багууд дуу бичигч бүрэн бүтэн байгааг баталжээ. Нислэгийн мэдээлэл бичигч буюу хар хайрцгийн нэг хэсгийг мөн олсон бөгөөд үлдсэн хэсгийг хайсаар байна.
Түүний хэлснээр онгоцны бусад сэг, хөдөлгүүрийн эд анги, хүний шарилыг ч олжээ.
Хайлт ослоос хойш бараг сар үргэлжилсэн юм. Онгоц хоёр хэсэг болж хугарч, их бие нь 30 орчим метрийн гүнтэй намагт бүрэн живсэн тул шарил болон эд ангийг гаргахад хүндрэлтэй байжээ.
Бенин хотоос Лагос руу ердийн даалгавраар нисэж байсан онгоц 10 дугаар сарын 5-нд Игбокода дахь Тэнгисийн цэргийн хүчний бааз орчмын намагт унаж, онгоцонд байсан 25 хүн бүгд амь үрэгдсэн юм.
