Орос, АНУ, Хятад цөмийн салбар дахь хиймэл оюуны асуудлаар хэлэлцэж байна гэж Эс Си Эм Пи мэдээлжээ

Москва, Бээжин, Вашингтон Шэньжэнь хотод болох Ази, Номхон далайн эдийн засгийн хамтын ажиллагааны дээд хэмжээний уулзалтын үеэр удирдагчдынхаа хэлэлцээний сэдэв, протоколыг хэдэн долоо хоногийн турш тохиролцохыг оролдсон гэж Саут Чайна Морнинг Пост сонин эх сурвалжуудыг иш татан мэдээлжээ. Энэ тухай Ведомости сонин мэдээлэв.

Хэлэлцэх сэдвүүдийн нэг нь цөмийн командлал, хяналтад хиймэл оюун ухааны гүйцэтгэх үүрэг аж.

Тус сонины мэдээлснээр, Украины мөргөлдөөн, Солонгосын хойгийг цөмийн зэвсгээс ангижруулах асуудал хэлэлцэх сэдвээс бараг хасагдаж, зөвшилцөлд хүрч болох чиглэлд анхаарал хандуулах болжээ. Гурван орны хэлэлцээ дэлхийн засаглалын өргөн хүрээнд цөмийн зэвсэглэл дэх хиймэл оюуныг хянах амлалт авахад хүргэж болзошгүй гэнэ.

АНУ-ын Төрийн нарийн бичгийн дарга Марко Рубио Трамп цөмийн зэвсгийн асуудлыг хэлэлцэхээр Орос, Хятадын удирдлагатай гурван талт дээд хэмжээний уулзалт хийх бодолтой байгааг мэдэгджээ.

Уолл Стрит Жорнал 11 дүгээр сарын 10-нд Бээжин, Вашингтон гурван талт уулзалтын хэлбэрийн талаар санал зөрөлдсөн гэж мэдээлж байжээ. Бээжин Владимир Путин, Ши Жиньпин, Дональд Трамп нарын уулзалтыг удирдагч бүр бэлтгэсэн мэдэгдлээ уншдаг хатуу хэлбэрээр явуулахыг хүсэж байгаа бол Трампын засаг захиргаа илүү чөлөөтэй санал солилцох хэлбэрийг шаардаж байна.