Орос энэ оны эхний есөн сард 63 500 гадаадын иргэнийг албадан гаргажээ

Оросын Холбооны шүүхийн шийдвэр гүйцэтгэх алба 2026 оны 1-9 дүгээр сард хууль зөрчсөн 63 500 гадаадын иргэнийг тус улсаас албадан гаргасныг Төрийн Думын дарга Вячеслав Володин мэдэгдсэнийг Ведомости сонин мэдээлжээ.

Тэрбээр гадаадын иргэнийг албадан гаргаж болох захиргааны зөрчлийн жагсаалтыг хоёр дахин илүү өргөжүүлсэн хууль 11 дүгээр сарын 3-нд хүчин төгөлдөр болсныг сануулжээ. Захиргааны зөрчлийн тухай хуулийн холбогдох зүйлийн тоо 22-оос 45 болж нэмэгджээ.

Жагсаалтад хар тамхины хууль бус эргэлт, цагаачлалын дүрэм зөрчих, интернэт дэх зарим зөрчил, Оросын зэвсэгт хүчнийг олон нийтийн өмнө гутаах, Оросын эсрэг хориг арга хэмжээ авахыг уриалах зэрэг зөрчил багтжээ.

Дотоод хэргийн яамны мэдээллээр 2026 оны эхний найман сард 260 000 гаруй цагаачийг Орост нэвтрүүлэхийг хориглосон нь өнгөрсөн оны мөн үеэс 75.8 хувиар их байна. Володины хэлснээр татгалзлын дийлэнх нь захиргааны журмаар албадан гаргах, депортлохтой холбоотой.

Төрийн Дум 2024 оноос хойш цагаачлалын бодлогын чиглэлээр 32 холбооны хууль баталсан бөгөөд үүний 21-ийг депутатууд өргөн барьжээ. Мөн 800 000 орчим гадаадын иргэнийг хяналтад байгаа хүмүүсийн бүртгэлд оруулсан байна.