Оросын Холбооны аюулгүй байдлын алба криптобиржийн хэрэглэгчдийн хувийн мэдээлэлд нэвтрэх эрх авна

Оросын Холбооны аюулгүй байдлын алба криптобирж, криптовалют солилцооны газрын үйлчлүүлэгчдийн хувийн мэдээлэлд нэвтрэх шинэ хэрэгсэлтэй болохыг Төв банкны 10 дугаар сарын сүүлээр нийтэлсэн баримт бичиг харуулж байгааг Медуза сайт мэдээлжээ.

Баримт бичиг нь хэрэглэгчийн мэдээллийг тагнуулын албанд дамжуулах шинэ серверийн системийг бүтээгчдэд зориулсан нарийвчилсан заавар юм. Ийм сервер тодорхой компанийн мэдээллийн санд нэвтэрч, тагнуулын албаны хүсэлтээр мэдээлэл дамжуулдаг.

Компаниуд мэдээллийг дор хаяж таван жил хадгалж, тагнуулын албаны хүсэлтээр архивын болон бодит цагийн хяналтын мэдээллийг автоматаар дамжуулах ёстой.

Кибер өмгөөлөгч Саркис Дарбинян Төв банк хувийн түлхүүрийг ийм системээр дамжуулахыг тодорхой хориглох саналыг тусгахаас татгалзсаныг онцолжээ. Хэрэв тагнуулын алба биржийн хадгалдаг түрийвчийн түлхүүрт хандах эрхтэй болбол түрийвч дэх криптовалютаар бие даан гүйлгээ хийх техникийн боломжтой болно.

Шинэ хуулиар 2027 оны 7 дугаар сарын 1-нээс иргэд, байгууллагууд криптовалютыг зөвхөн хууль ёсны брокер, бирж, солилцооны газраар дамжуулан худалдах, худалдан авах эрхтэй болно.