Шэньжэнь дэх АПЕК-ийн уулзалтад Тайвань Эйсэрийг үүсгэн байгуулагч Стэн Шиг илгээж, тэгш оролцоог шаардлаа

Компьютер үйлдвэрлэгч Эйсэр компанийг үүсгэн байгуулагч Стэн Ши ирэх долоо хоногт Хятадад болох Ази, Номхон далайн эдийн засгийн хамтын ажиллагааны (АПЕК) дээд хэмжээний уулзалтад удирдагчийн төлөөлөгчөөр оролцоно гэж Тайванийн Ерөнхийлөгчийн тамгын газар 11 дүгээр сарын 11-нд буюу Лхагва гарагт мэдэгдсэнийг Дойче Велле мэдээлжээ. Тайвань мөн тэгш оролцоог хангах тухай Бээжингийн бичгээр өгсөн баталгааг биелүүлэхийг шаарджээ.

АПЕК бол Тайванийн оролцдог олон улсын цөөхөн байгууллагын нэг юм. Хятад Тайванийг өөрийн нутаг дэвсгэр гэж үздэг. Энэ жил уулзалтыг Хятад зохион байгуулж байгаа бөгөөд удирдагчдын уулзалт ирэх долоо хоногт тус улсын өмнөд нутгийн Шэньжэнь хотод болно. АНУ-ын Ерөнхийлөгч Трамп тэнд Хятадын дарга Ши Жиньпинтэй энэ жилийн гурав дахь уулзалтаа хийх төлөвтэй байна.

Тайбэй, Бээжингийн харилцаа туйлын хурцадмал байна. Тайванийн Ерөнхийлөгч Лай Чин Тэгийг Хятад “салан тусгаарлагч” гэж үзэж, түүнтэй яриа хэлэлцээ хийхээс татгалзаж байна. Хятадын арми Тайванийн эргэн тойронд өдөр бүр үйл ажиллагаа явуулж байна.

Тамгын газрын хэвлэлийн төлөөлөгч Гуо Я Хуй тэгш оролцоо нь АПЕК-ийн олон жилийн уламжлал бөгөөд нэг Хятадын гэгдэх зарчимтай ямар ч холбоогүй гэж онцолжээ. Зохион байгуулагч эдийн засаг болох Хятад хүлээсэн үүрэг, бичгээр өгсөн баталгаагаа биелүүлж, Тайванийн төлөөлөгчдийг тэгш, нэр төртэй, аюулгүй нөхцөлд оролцуулахыг Тайвань хүлээж байна гэж тэрбээр хэлэв.

Хятадын Тайванийн асуудал эрхэлсэн газар тухайн өдрийн эхээр Тайванийн оролцоог нэг Хятадын зарчим, АПЕК-ийн холбогдох санамж бичгийн заалт, тогтсон жишгийн дагуу шийддэг гэж мэдэгджээ. Ийм журмыг дагавал Тайвань оролцож болно гэж тус газар нэмж хэлсэн байна.

Тайванийн Хөдөлмөрийн сайд, Сангийн сайд нар энэ жил Хятадад болсон АПЕК-ийн уулзалтуудад ямар нэг асуудалгүй оролцсон байна. Гэвч Хятад урилгыг уламжлал ёсоор элч томилж биечлэн гардуулалгүй, имэйлээр илгээсэнд Тайвань даруй эсэргүүцлээ илэрхийлсэн гэж Тайванийн Гадаад хэргийн сайд Линь Жялун өнгөрсөн долоо хоногт хэлжээ.

Улс төрийн асуудлаас зайлсхийхийн тулд Тайвань АПЕК-т ихэвчлэн албан тушаалтан асан эсвэл бизнесийн удирдлагыг удирдагчийн төлөөлөгчөөр илгээдэг. Стэн Ши 2007 онд Австралид болсон АПЕК-ийн уулзалтад Тайванийг төлөөлж байжээ.