Сөүлийн төвийн 5 ахмад дайчин Инвиктус наадмын Солонгосын багт сонгогджээ

Цэргийн албандаа шархадсан залуу ахмад дайчдад зориулсан Сөүлийн зөвлөгөөний төвтэй холбоотой 5 ахмад дайчин 2027 оны Инвиктус наадамд оролцох Солонгосын 11 хүний бүрэлдэхүүнд багтжээ. Энэ тухай Корея Таймс сонин Сөүл хотын захиргааг иш татан мэдээлэв.

Инвиктус наадам бол цэргийн албандаа шархадсан, гэмтсэн, өвчилсөн алба хаагч, ахмад дайчдын олон улсын олон төрөлт тэмцээн юм. Их Британийн хунтайж Харри 2014 онд шархадсан цэргүүдийн нөхөн сэргээлт, энгийн амьдралд эргэн ороход нь туслах зорилгоор үүнийг үүсгэн байгуулжээ.

Сонгогдсон 5 хүний 2 нь төвийн үе тэнгийн дэмжлэгийн бүлгийн гишүүн, нэг нь төвийн үйл ажиллагаа хариуцсан дарга асан, 2 нь одоогийн ажилтан юм. Бүгд цэргийн албандаа гэмтэж, нөхөн сэргээлт, спортын тусламжтайгаар амьдралаа дахин босгосон хүмүүс аж.

Тамирчдын нэг, Армийн нисэх онгоцны засварын ахлагч асан эмэгтэй 2008 онд 4 давхраас унаж, хоёр хөл нь хэсэгчлэн саажжээ. Тэрбээр дараа нь сэлүүрт завиар хичээллэж, 2024 оны Үндэсний паранаадамд алтан медаль хүртсэн байна.

Өөр нэг гишүүн 2018 онд цэргийн автобус онхолдсоны улмаас бэлхүүсээс доош саажилттай болж, 2023 онд Хятадын Ханжоу хотод болсон Азийн паранаадамд сэлүүрт завиар оролцсон юм.

Төвийн үйл ажиллагааны дарга асан нь 2019 онд Тэнгисийн явган цэргийн офицер байхдаа Гёнги мужийн Гимпо дахь Хан мөрний амны ойролцоо минад тэсэрч, зүүн хөлөө алджээ. Тэрбээр 2023 онд Германд болсон Инвиктус наадамд мөнгөн медаль авсан байна. Одоогийн ажилтнуудын нэг нь 2022 онд мина тэсрэхэд шагайгаа алдах шахсан бол нөгөө нь 2010 онд Хойд Солонгос Ёнпён арал руу их буугаар довтлох үеэр хэлтэрхийд шархаджээ.

2027 оны наадам Английн Бирмингем хотод 7 дугаар сарын 10-аас 17-ны хооронд болох юм. Тэнд 26 орны 550 орчим тамирчин зэрэг 3,000 орчим хүн оролцох төлөвтэй бөгөөд пиклбол, цахим спорт, 3х3 сагсан бөмбөг зэрэг шинэ төрлийг нэмж, нийт 13 төрөлд өрсөлдөнө.

2022 оны 3 дугаар сард нээгдсэн уг төвийг Сөүлийн нийгмийн халамжийн сан ажиллуулдаг юм. Тус төв хууль зүйн болон сэтгэл зүйн зөвлөгөө өгч, ажил, орон сууцны дэмжлэг үзүүлдэг бөгөөд 10 дугаар сар хүртэл 3,056 зөвлөгөө, 1,072 удаагийн хувийн сэтгэл зүйн зөвлөгөө өгчээ.