Цэвэр эрчим хүчинд Хятадын гүйцэтгэх үүрэг маргаангүй гэж Олон улсын эрчим хүчний агентлагийн тэргүүн мэдэгдэв

Хятад цахилгаанжуулалтын замд анхдагч алхам хийсэн бөгөөд цэвэр эрчим хүчинд гүйцэтгэх үүрэг нь маргаангүй гэж Олон улсын эрчим хүчний агентлагийн гүйцэтгэх захирал Фатих Бирол мэдэгджээ. Энэ тухай Хятадын И Си Эн Эс сайт мэдээлэв.

Бирол Мягмар гарагт Туркийн Анталья хотод болж буй НҮБ-ын уур амьсгалын бага хурлын үеэр Хятадын павильонд зохион байгуулсан арга хэмжээнд үг хэлжээ. Тэрбээр дэлхий цахилгааны эрин үед орж байна гэсэн 2 жилийн өмнөх дүгнэлтээ дахин сануулж, цахилгаанжуулалт эдийн засаг, эрчим хүчний аюулгүй байдал, уур амьсгал, агаарын чанарт ашигтай гэж үзсэн байна.

Хятад цахилгаан тээврийн хэрэгсэл, сэргээгдэх эрчим хүч, батарейн хуримтлуурын салбарт томоохон ахиц гаргаж, усан цахилгаан, нар, салхи, цэвэр түлшний хүчтэй үйлдвэрлэлийн сүлжээтэй болсныг Бирол өндрөөр үнэлжээ. “Хятад дэлхийд зам заасан” гэж тэрбээр хэлсэн байна.

Бирол сүүлийн найм, есөн сарын дэлхийн эрчим хүчний зах зээлийн хөгжилд үндэслэн шилжилтийг тодорхойлж буй гурван гол чиг хандлагыг онцолжээ.

Нэгдүгээрт, сэргээгдэх эрчим хүч хүчтэй өсч, эрчим хүчний сүүлийн үеийн дарамт үүнийг улам хурдасгажээ. Хоёрдугаарт, Хятадаас бусад дэлхийн цахилгаан машины борлуулалт 60 хувиар өсч, Австрали, Бразил, Тайланд, Вьетнам зэрэг зах зээлд ч энэ хандлага ажиглагдаж байна. Гуравдугаарт, эрчим хүчний хэмнэлтэд илүү анхаарах болсон юм.

Бирол Антальяд цугларсан 200 шахам орныг цахилгаанжуулалтын зорилтын талаар тохиролцоонд хүрэхийг уриалжээ. Ирээдүй цахилгааных гэсэн тодорхой мессежийг бага хурлаас дамжуулах нь дэлхийн зах зээл, хөрөнгө оруулагчдад илт дохио болно гэж тэрбээр онцолсон байна.

Хөрөнгө оруулагчид арилжааны тогтвортой өгөөж хүлээдэг учраас цэвэр эрчим хүчинд хөрөнгө урсдаг бөгөөд зөвшилцөлд хүрвэл тэд хөрөнгөө хаана байршуулахаа тодорхой мэдэх юм.