Уиткофф: Путин Европыг Украины энхийн хэлэлцээнд оролцуулахыг зөвшөөрөв

ОХУ-ын Ерөнхийлөгч Владимир Путин Украины асуудлаарх энхийн хэлэлцээний дараагийн шатанд Европын төлөөлөгчдийг оролцуулахыг пүрэв гарагт зөвшөөрсөн гэж АНУ-ын Ерөнхийлөгчийн тусгай элч Стив Уиткофф мэдэгдлээ.

“Европчууд дараагийн уулзалтад нэгдэнэ. Бид үүнийг маш том алхам гэж үзэж байна. Учир нь тэд манай түншүүд, тэдний оролцоо чухал” гэж Уиткофф хэлэв. Тэрбээр нөгөө элч Жаред Кушнерийн хамт Москвад Путинтэй дөрвөн цаг хагас уулзсаны дараа ингэж мэдэгджээ.

АНУ-ын хоёр элч пүрэв гарагийн орой Дублинд Украины Ерөнхийлөгч Володимир Зеленскийтэй уулзана. Зеленский тэнд Европын улс төрийн хамтын нийгэмлэгийн уулзалтад оролцож байна. Европын холбооны удирдагчид баасан гарагт Украины энхийн хэлэлцээний талаар ярилцана.

Дублинд бид “болсон бүх зүйлийн талаар Зеленскийд бүрэн мэдээлэл өгнө” гэж Уиткофф хэлжээ.

Абу-Дабид энэ долоо хоногт болсон сүүлийн шатны хэлэлцээний дараа Европын засгийн газрууд ахиц гарна гэдэгт эргэлзэж байна.

“Оросын шаардлага бол бидний олон жил сонссон хэт туйлширсан шаардлага хэвээр” гэж хэлэлцээ хаалттай явагдсан тул нэрээ дурдуулахгүй байхыг хүссэн нэгэн дипломатч хэлэв. Абу-Дабигаас буцаж ирсэн Бьорн Зайберт, Анна-Мария Боура нар ЕХ-ны элчин сайд нарт мэдээлэл өгчээ. Зайберт бол Европын комиссын дарга Урсула фон дер Ляйений тамгын газрын дарга, Боура бол Европын зөвлөлийн дарга Антониу Коштагийн гадаад бодлогын ахлах зөвлөх юм.