Европын олон оронд онгоц, хэвлэл мэдээллийн байгууллагууд бөмбөгийн заналхийлэл хүлээн авчээ

Франц, Болгар, Чех, Австри, Данийн нисэх онгоцны буудлууд сүүлийн өдрүүдэд бөмбөгийн заналхийлэл хүлээн авсан нислэгүүдийг шалгаж, 6-нд Ирланд, Их Британийн хэвлэл мэдээллийн байгууллагууд ч ийм заналхийлэлд өртсөн гэж Чайна Ньюс сайт мэдээлжээ.

Францын Ерөнхий сайдын газрын мэдээлснээр 6-нд тус улсын агаарын орон зайгаар нисэж явсан 4 онгоц бөмбөгийн заналхийлэл хүлээн авчээ. Тэдгээрээс 3 нь Парисын Орли, нэг нь Бордогийн нисэх буудалд аюулгүй газардаж, шалгалтад орсон байна.

Болгарт Лондон, Брюсселээс ирсэн хоёр онгоцыг Софийн нисэх буудалд шалгасан ч сэжигтэй зүйл илрээгүй. Прагийн нисэх буудалд 9 нислэг заналхийлэлд өртсөний 4 нь ирэх, 5 нь гарах нислэг байсан ч цагдаа тэсрэх төхөөрөмж илрүүлээгүй аж.

Венийн нисэх буудал 5-нд 4 нислэгт чиглэсэн бүрхэг заналхийлэл бүхий имэйл хүлээн авчээ. Австрийн эрх баригчид дуурайн үйлдэх хэрэг гарахаас болгоомжилж дэлгэрэнгүй мэдээлэл өгөөгүй гэнэ.

Ирландын үндэсний радио телевиз, Бауэр Медиа групп, Виржин Медиа групп ажилтнуудаа нүүлгэн шилжүүлж, зарим нэвтрүүлэг түр тасалдсан юм. Шууд нэвтрүүлгээр уншсан захидлын хэсэгт илгээгч нь энэ долоо хоногт нислэгүүдэд заналхийлсэн байгууллага гэж өөрийгөө тодорхойлсон ч нэрээ дурдаагүй байв. Их Британийн Скай Ньюс суваг ч заналхийлэл хүлээн авснаа мэдэгдлээ.

Заналхийллийг нэрээ нууцалж илгээсэн тул эх сурвалжийг тогтооход хэцүү байгааг Нидерландын Хууль зүй, аюулгүй байдлын сайд Давид ван Вел хэлсэн. Төрийн оролцоотой гэх шинж одоогоор алга ч ямар ч хувилбарыг үгүйсгээгүй гэнэ.

ЕХ-ны Тогтвортой тээвэр, аялал жуулчлалын комиссар Цицикостас нисэхийн аюулгүй байдлын мэдээлэл солилцох механизмыг идэвхжүүлснийг дурдаад, хэргүүд хоорондоо холбоотой эсэхийг дүгнэхэд эрт байна гэв. Италийн Гадаад хэргийн сайд Таяни ч буруутныг тогтоох нотлох баримт алга гэжээ.

Мөн 6-ны орой Швейцарийн Шаффхаузен галт тэрэгний буудал болон түүний орчмыг сэжигтэй ачаа тээшний улмаас хааж, тэр чиглэлийн галт тэрэгний хөдөлгөөнийг зогсоожээ.